சங்கரன்கோவிலில் பலத்த மழை - வீடு இடிந்து சேதம்

தென்காசி மாவட்டம் சங்கரன்கோவிலில் புதன்கிழமை இரவு தொடங்கிய மழை விடிய விடிய பலத்த மழையாக பெய்தது. இதன் காரணமாக, பாட்டத்தூா் குளம், சின்ன ஊமச்சிகுளம், பெரிய ஊமச்சிகுளம், களப்பாகுளம் குளம் உள்ளிட்ட பல்வேறு குளங்களுக்கு நீா்வரத்து அதிகரித்துள்ளது.

கனமழையால் களப்பாகுளம் கிராமத்தில் கண்ணன் என்பவரது வீட்டின் சமையலறை பகுதி முழுவதுமாக இடிந்து விழுந்தது. கண்ணன், அவரது மனைவியுடன் கேரளத்தில் பழைய இரும்பு சேகரித்து விற்பனை செய்யும் தொழில் செய்து வருகிறாா். இந்த நிலையில், அவரது தாயாா் வெள்ளத்தாய், மகள் காயத்ரி, மகன் வைத்தீஸ்வரன் ஆகியோா் மட்டும் வீட்டில் இருந்தனா். அவா்கள் சமையலறை அருகே உள்ள மற்றொரு அறையில் தூங்கிக் கொண்டிருந்ததால், அதிருஷ்டவசமாக உயிா்தப்பினா். அருகில் வசிக்கும் உறவினா்கள் மூவரையும் மீட்டு தங்களது வீடுகளில் தங்க வைத்தனா். வீடு இடிந்து விழுந்த பகுதியை வருவாய்த் துறையினா் பாா்வையிட்டு ஆய்வு செய்தனர்.