குடியாத்தம் அருகே குடிநீர் வழங்காததை கண்டித்து காலி குடங்களுடன் மறியல்

வேலூர் மாவட்டம் குடியாத்தம் அடுத்த உள்ளி ஊராட்சியை சேர்ந்த பட்டுவாம்பட்டி, வேலாயுதம்பட்டி, ஞானமேடு, உள்ளிட்ட பகுதிகளில் கடந்த இரண்டு மாதங்களாக முறையாக குடிநீர் வழங்கவில்லை என கூறப்படுகிறது. இது குறித்து ஊராட்சி நிர்வாகம் மற்றும் ஊராட்சி ஒன்றிய அலுவலகத்திலும் புகார் அளித்தும் எந்த விதமான நடவடிக்கை எடுக்கப்படவில்லை.

இதனிடையே இன்று குடியாத்தம் - மாதனூர் சாலையில் உள்ளி பகுதியில் காலி குடங்களுடன் பெண்கள் சாலை மறியலில் ஈடுபட்டனர். இதனால் அப்பகுதியில் போக்குவரத்து பாதிப்பு ஏற்பட்டது. உடனடியாக சம்பவ இடத்திற்கு வந்த குடியாத்தம் தாலுகா போலீசார் சாலை மறியலில் ஈடுபட்ட பொதுமக்களிடம் பேச்சுவார்த்தையில் ஈடுபட்டனர். இதனையடுத்து சமரசம் ஏற்பட்டு பெண்கள் சாலை மறியலை கைவிட்டு கலைந்து சென்றனர்.

இதனால் குடியாத்தம் மாதனூர் சாலையில் சிறிது நேரம் போக்குவரத்து பாதிப்பு ஏற்பட்டது.