சிவகங்கை அருகே சிறையிலிருந்து தப்பியோடிய கைதி: விரைந்து பிடித்த போலீசார்

மதுரை மத்திய சிறை கட்டுப்பாட்டில் உள்ள புரசரை உடைப்பு திறந்தவெளி சிறை சிவகங்கை மாவட்டத்தில் செயல்பட்டு வருகிறது. இந்த திறந்தவெளி சிறைச்சாலை சுமார் 84 ஏக்கர் நிலப்பரப்பில் அமைந்துள்ளது.

இங்கு நன்னடத்தை அடிப்படையில் தேர்வு செய்யப்படும் சிறைவாசிகளைக் கொண்டு இயற்கை விவசாயம், ஆடு, மாடு மேய்த்தல் போன்ற பணிகள் மேற்கொள்ளப்பட்டு வருகிறது. இங்கு சுமார் 51 சிறைவாசிகள் உள்ளனர். இங்கு தண்டனை சிறைவாசியாக இருந்த கோபால் போக்சோ வழக்கில் இருந்து வந்த நிலையில் ஆடு மேய்க்கும் பணிக்கு நியமிக்கப்பட்டிருந்தார்.

நேற்று ஆடு மேய்க்கும் பணியில் இருந்தபோது சிறையில் இருந்து தப்பி ஓடிவிட்டார். இதுகுறித்து அறிந்த சிறைத்துறை அதிகாரிகள் மதுரை சரக சிறை துறை டிஐஜி பழனி மற்றும் சிறைத்துறை எஸ்.பி சதீஷ்குமார் உடனடியாக சம்பவ இடத்திற்கு விரைந்து சென்று விசாரணை செய்து தனிப்படை அமைத்து தேடி வந்தனர். இந்நிலையில் இன்று காலை 7 மணி அளவில் மதுரை மாவட்டம் கூடக்கோயில் அருகே உள்ள திருமால் என்ற கிராமத்தில் தனி படையினரால் அவரை கைது செய்தனர்.

துரிதமாக செயல்பட்டு சிறைவாசியை உடனடியாக கைது செய்த சிறை தனிப்படையினரை மதுரை சரக டிஐஜி பழனி மற்றும் மதுரை சிறை எஸ்பி சதீஷ்குமார் ஆகியோர் பாராட்டினார்.