பொள்ளாச்சி அருகே தொடர் தேங்காய் திருட்டு: மூவர் கைது

கோவை மாவட்டம் பொள்ளாச்சி கோட்டூர் அருகே உள்ள தேவனூர்புதூரைச் சேர்ந்தவர் மருத்துவர் ராஜீவ் ஆனந்த்.இவருக்கு அப்பகுதியில் சொந்தமாக தோட்டம் உள்ள நிலையில் அங்கு தென்னை உட்பட பல்வேறு ஊடு பயிர்களை பயிரிட்டுள்ளார்.

இவரது தோட்டத்தில் ஏராளமானோர் பணிபுரிந்து வரும் நிலையில் தேங்காய்கள் திருடு போவது தொடர் கதையாக நடந்து வந்துள்ளது.இதுகுறித்து மருத்துவர் ராஜீவ் ஆனந்த் விசாரணை மேற்கொண்டு வந்த நிலையில் தோட்டத்தில் பணிபுரிந்து வரும் அருண் என்பவர் பேசி கொண்டிருந்தபோது மூன்று மர்ம நபர்கள் அங்கு குவித்து வைக்கப்பட்டிருந்த தேங்காய்களை திருடிக் கொண்டு இருப்பதை கண்டவர் சத்தம் போடவே மர்ம நபர்கள் அங்கிருந்து தப்பி ஓடி விட்டனர்.

இதனை அடுத்து சம்பவ இடத்திற்கு வந்த மருத்துவர் நூற்றுக்கும் மேற்பட்ட தேங்காய்கள் திருடு போயிருப்பதை கண்டு காவல் நிலையத்தில் புகார் அளித்தார்.

புகாரின் பேரில் வழக்கு பதிவு செய்த கோட்டூர் போலீசார் நடத்திய விசாரணையில் திருட்டு சம்பவத்தில் ஈடுபட்டது தென்சங்கம்பாளையம் பகுதியை சேர்ந்த செந்தில்குமார்(32),பாலன் என்ற மாரிமுத்து(30) மாணிக்கம்(27) ஆகிய மூவரையும் கைது செய்து விசாரித்து வருகின்றனர்.