இரணியல் அருகே ஒன்றரை கிலோ கஞ்சாவுடன் மூன்று பேர் கைது

கன்னியாகுமரி மாவட்டம் தக்கலை மதுவிலக்கு போலீஸ் இன்ஸ்பெக்டர் ஜோதிலட்சுமி தலைமையிலான போலீசார் இரணியல் அருகே வாகன சோதனையில் நேற்று ஈடுபட்டனர். அப்போது 3  மோட்டார் சைக்கிளில் வந்த மூன்று வாலிபர்களை சந்தேகத்தின் பேரில் பிடித்து விசாரித்தனர். தொடர் சோதனையில் மோட்டார் சைக்கிளில்  கஞ்சா பொட்டலங்கள் இருந்தது தெரிய வந்தது. மொத்தம் ஒன்றரை கிலோ கஞ்சா இருந்தது கண்டுபிடிக்கப்பட்டது. இதை அடுத்து கஞ்சா பொட்டலங்கள், 3 மோட்டார் சைக்கிள்களையும்  போலீஸ் நிலையத்தில் கொண்டு விசாரித்தனர். விசாரணையில் பிடிபட்டவர்கள் வர்த்தக நகரை சேர்ந்த சகாய சுபின் (25), கட்டிமாங்கோட்டை சேர்ந்த சிவசங்கர் (26), கீழப்பெரு விளையை சேர்ந்த விஷ்ணுகுமார் (24) என்பது தெரிய வந்தது. போலீசார் அவர்களை கைது செய்தனர்.  வெளியூர்களில் இருந்து இந்த கஞ்சாவை வாங்கி வந்து சில்லறையாக இங்கு விற்பனை செய்வதாக கூறினர்.  மேலும் யாருக்காவது தொடர்பு உண்டா? என்பது குறித்து விசாரணை நடைபெற்று வருகிறது.