பேட்டரி மற்றும் அலுமினிய வயர்களை திருடி சென்ற இருவர் கைது

தூத்துக்குடி மாவட்டம், கடம்பூர் - பசுவந்தனை ரோடு பகுதியில் உள்ள ரயில்வே கேட் அருகே ஒரு தனியார் கட்டுமான நிறுவனம் சுரங்கப்பாதை கட்டி வருகின்றனர். இந்நிலையில் சுரங்கபாதை கட்டும் பகுதியில், கட்டுமான பணிக்கு பயன்படுத்தப்படும் அலுமினிய வயர்கள் மற்றும் பேட்டரி ஆகியவற்றை மர்ம நபர்கள் கடந்த 05.12.2023 அன்று இருசக்கர வாகனத்தில் வைத்து திருடி சென்றுள்ளனர்.

இதுகுறித்து கட்டுமான நிறுவனத்தின் தள மேற்பார்வையாளரான கடம்பூர் கே. சிதம்பராபுரம் பகுதியைச் சேர்ந்த  நாகராஜன் (47) என்பவர் அளித்த புகாரின் பேரில் கடம்பூர் போலீசார் வழக்குபதிவு செய்து விசாரணை மேற்கொண்டதில் கடம்பூர் தங்கம்மாள்புரம் பகுதியை சேர்ந்த வேல்முருகன் (33) மற்றும் கடம்பூர் பாரதி வீதி பகுதியை சேர்ந்த  மகாராஜன் (23) ஆகியோர் சேர்ந்து பேட்டரி மற்றும் அலுமினிய வயர்களை திருடி சென்றது தெரியவந்தது. இதனையடுத்து கடம்பூர் காவல் நிலைய உதவி ஆய்வாளர் உலகநாதன் மற்றும் போலீசார் வேல்முருகன் மற்றும் மகாராஜன் ஆகிய இருவரையும் கைது செய்து அவர்களிடமிருந்த ரூபாய் 10,000/- மதிப்புள்ள 100 மீட்டர் நீளமுள்ள அலுமினிய வயர்கள்,  பேட்டரி மற்றும் திருடுவதற்கு பயன்படுத்தப்பட்ட இருசக்கர வாகனம் ஆகியவற்றையும் பறிமுதல் செய்தனர். மேலும் இதுகுறித்து கடம்பூர் போலீசார் விசாரணை மேற்கொண்டு வருகின்றனர்.  கைது செய்யப்பட்ட வேல்முருகன் மீது ஏற்கனவே கடம்பூர் காவல் நிலையத்தில் 3 வழக்குகளும், மகாராஜன் மீது 2 வழக்குகளும் உள்ளது குறிப்பிடத்தக்கது.