பரமத்தி அருகே சாலையை கடக்க முயன்ற கணவன் மனைவி சாலை விபத்தில் பலி.

பரமத்தி வேலூர்-21:       நாமக்கல் மாவட்டம் பரமத்திவேலூர் அருகே உள்ள மறவர்பாளையம் குடித்தெரு பகுதியைச் சேர்ந்தவர் சின்னையன் (70), இவரது மனைவி சாந்தி (60). இவர்கள் இருவரும் இருசக்கர வாகனத்தில் பரமத்தி செல்வதற்காக கரூர் சேலம் தேசிய நெடுஞ்சாலையை கடக்க முயன்றுள்ளனர். அப்போது கரூரிலிருந்து நாமக்கல் நோக்கி சென்ற கார் எதிர்பாராத விதமாக அவர்கள் சென்ற இருசக்கர வாகனத்தின் மீது  மோதியதில் கணவன் மனைவி இருவரும் தூக்கி  வீசப்பட்டனர்.  இதனால் கட்டுப்பாட்டை இழந்த கார் சாலையோரம் இருந்த பள்ளத்தில் தலை குப்பிற கவிழ்ந்தது. இதில் காரில் சென்ற தர்மபுரியைச் சேர்ந்த செந்தில்குமார் (34),ரேனுகாதேவி (30), விஜயகுமார் (40), வெங்கடேஷ் (35),சித்ரா (25) ஆகிய 5 பேர்களும் பலத்த காயங்களுடன் மீட்கப்பட்டு நாமக்கல் தனியார் மருத்துவமனைக்கு சிகிச்சைக்காக அனுப்பி வைக்கப்பட்டனர். உயிருக்கு ஆபத்தான நிலையில் கிடந்த சின்னையன் மற்றும் அவரது மனைவி இருவரையும் மீட்டு பரமத்திவேலூர் அரசு மருத்துவமனைக்கு சிகிச்சைக்காக அனுப்பி வைத்தனர். அங்கு அவர்களை சோதித்த மருத்துவர்கள் ஏற்கனவே அவர்கள் இருவரும் இறந்து விட்டதாக தெரிவித்தனர். தகவலறிந்து சம்பவ இடத்துக்கு வந்த பரமத்தி போலீசார் விசாரணை விபத்து குறித்து விசாரணை நடத்தி வருகின்றனர். விபத்தில் உயிரிழந்த இருவரின் உடலை பரமத்தி வேலூர் அரசு மருத்துவமனையில் பிரேதபரிசோதனைக்கு அனுப்பி வைத்தனர். இந்த சாலை விபத்தினால் தேசிய நெடுஞ்சாலையில் சிறிது நேரம் போக்குவரத்து பாதிக்கப்பட்டது.