திருவக்கரை கல்குவாரியில் கொத்தனார் கொலை வழக்கில், மேலும் ஒரு நபரை போலீசார் கைது செய்தனர்.

விழுப்புரம் மாவட்டம்,திருவக்கரை கல்குவாரியில் வீசப்பட்ட தலையில்லாத ஆண் சடலத்தை வானூர் போலீசார் கைப்பற்றி விசாரித்தனர். திருவெண்ணைநல்லுார் அடுத்த சரவணப்பாக்கத்தை சேர்ந்த கொத்தனார் ராஜதுரை, 32; என்பவரை, முன்விரோதம் காரணமாக ஒரு கும்பல் கொலை செய்து, உடலை கல்குவாரியில் வீசியது தெரிய வந்தது.இவ்வழக்கில் ஒன்பது பேர் கைது செய்யப்பட்டனர். இதில் தலைமறைவான சரவணப்பாக்கத்தை சேர்ந்த தங்கபாண்டி, வளவனுார் டி.எஸ்., நகரை சேர்ந்த சரவணன் மகன் புருஷோத்தமன், 25; ஆகிய இருவரை தேடி வந்தனர்.விழுப்புரத்தில் பதுங்கியிருந்த புருஷோத்தமனை போலீசார் நேற்று கைது செய்தனர். தங்கபாண்டியை தேடி வருகின்றனர்.