சேலம் பழைய பஸ் நிலையம் பகுதியில் வ உ சி பூ மார்க்கெட் உள்ளது. இந்த மார்க்கெட்டில் ஓமலூர், மேட்டூர், ஆத்தூர்,பனமரத்துபட்டி, உள்ளிட்ட மாவட்டத்தின் பல்வேறு பகுதிகளை சேர்ந்த விவசாயிகள் தங்கள் தோட்டத்தில் விளையும் பூக்களை கொண்டு வந்து விற்பனை செய்து வருகின்றனர். இங்கு பண்டிகை காலம், திருமண முகூர்த்த நாட்கள் மற்றும் முக்கிய நாட்களில் பூக்களின் விற்பனை அதிகமாக இருக்கும். மேலும் பூக்களின் வரத்துக்கு ஏற்ப விலை உயர்ந்தும், குறைந்தும் காணப்படும். இந்த நிலையில் பொங்கல் பண்டிகை நாளை முதல் கொண்டாடப்படுவதால் இன்று பூக்கள் விலை உயர்ந்து இருந்தது. அதாவது குண்டுமல்லி கிலோ ரூபாய் 2400 க்கு விற்பனை செய்யப்பட்டது. மற்ற பூக்களின் விலை நிலவரம் முல்லை ரூபாய் 2000, காக்கட்டான் ரூபாய் 1600, கலர் காக்கட்டான் ரூபாய் 1600, மலை காக்கட்டான் ரூபாய் 1600, நந்தியா வட்டம் ரூபாய் 300, சம்பங்கி ரூபாய் 190, சாதா சம்பங்கி ரூபாய் 250, அரளி ரூபாய் 400, வெள்ளை அரளி ரூபாய் 400, மஞ்சள் அரளி ரூபாய் 500 என்கிற விலையில் பூக்கள் விற்பனை செய்யப்பட்டன.