நாமக்கல் மாவட்டத்தில் 9 பேருக்கு மாநில நல்லாசிரியர் விருது!

நாமக்கல் மாவட்டத்தில் ஒன்பது ஆசிரியர்களுக்கு, மாநில நல்லாசிரியர் விருது வியாழக்கிழமை சென்னையில் வழங்கப்படுகிறது. ஒவ்வொரு ஆண்டும், செப்டம்பர்- 5-இல் ஆசிரியர் தினம் கொண்டாடப்பட்டு வருகிறது. இதனையொட்டி, அரசு மற்றும் தனியார் பள்ளிகளில் சிறப்பாக பணியாற்றிய அரசு மற்றும் தனியார் பள்ளி ஆசிரியர்களுக்கு மாநில நல்லாசிரியர் விருது வழங்கப்பட்டு வருகிறது. அந்த வகையில் நடப்பாண்டில் மாநிலம் முழுவதும் 388 ஆசிரியர்களுக்கு மாநில நல்லாசிரியர் விருது வழங்கப்பட உள்ளது. நாமக்கல் மாவட்டத்தை பொருத்தமட்டில், 24 ஆசிரியர்கள் நேர்காணல் செய்யப்பட்டு, 18 பேர் மட்டும் பரிந்துரை அடிப்படையில், சென்னை பள்ளி கல்வித்துறை அலுவலகத்திற்கு பட்டியல் அனுப்பி வைக்கப்பட்டது. இதில், உயர்நிலை, மேல்நிலைப் பள்ளி ஆசிரியர்கள் 4, தொடக்க, நடுநிலைப் பள்ளி ஆசிரியர்கள் 4, தனியார் பள்ளியில் இருந்த ஒருவர் என மொத்தம் 9 பேர் விருதுக்கு தேர்வாகினர். அவர்கள் விவரம்: கபிலர்மலை ஒன்றியம், ஜேடர்பாளையம் அரசு மேல்நிலைப்பள்ளி தலைமை ஆசிரியர் பெ.ராஜமாணிக்கம், வெண்ணந்தூர் ஒன்றியம், ஆர். புதுப்பாளையம் அரசு மேல்நிலைப்பள்ளி முதுகலை ஆசிரியர் இரா.சக்திவேல், எருமப்பட்டி அரசு ஆண்கள் மேல்நிலைப் பள்ளி முதுகலை ஆசிரியர் செ.செந்தில்குமார், குமாரபாளையம் அரசு ஆண்கள் மேல்நிலைப்பள்ளி தொழிற்கல்வி ஆசிரியர் நிலை-1 ச.கார்த்தி. கொல்லிமலை ஒன்றியம், சீக்குப்பாறைப்பட்டி ஊராட்சி ஒன்றிய தொடக்கப்பள்ளி தலைமை ஆசிரியர் ஐ. அன்னம்மாள், பள்ளிபாளையம் ஒன்றியம், வெடியரசம்பாளையம் ஊராட்சி ஒன்றிய தொடக்கப்பள்ளி இடைநிலை ஆசிரியர் ஞா.சொர்ணதீபம், பள்ளிபாளையம் நாராயண நகர் நகராட்சி தொடக்கப்பள்ளி தலைமை ஆசிரியர் பொ.பாரதி, ராசிபுரம் ஒன்றியம், வி.நகர் நகராட்சி நடுநிலைப்பள்ளி தலைமை ஆசிரியர் வே.லட்சுமி, நாமக்கல் டிரினிடி அகாடமி பள்ளி ஆசிரியர் ரமேஷ் உள்ளிட்டோர். இவர்களுக்கு, மாவட்ட ஆட்சியர் ச.உமா, முதன்மை கல்வி அலுவலர் ப.மகேஸ்வரி மற்றும் ஆசிரியர்கள் பலர் வாழ்த்துகளை தெரிவித்தனர். சென்னையில் வியாழக்கிழமை நடைபெறும் விழாவில் தமிழக பள்ளி கல்வித்துறை அமைச்சர் அன்பில் மகேஷ், மாநில நல்லாசிரியர்களுக்கு விருது மற்றும் பரிசுத் தொகையை வழங்க உள்ளார்.