பிரதமர் மோடி விழா பாதுகாப்பு பணிக்காக சேலத்தில் இருந்து 250 போலீசார் திருச்சி பயணம்

திருச்சி பாரதிதாசன் பல்கலைக்கழகத்தின் பட்டமளிப்பு விழா நாளை (செவ்வாய்க்கிழமை) நடக்கிறது. இதில், பிரதமர் நரேந்திரமோடி கலந்து கொண்டு மாணவர்களுக்கு பட்டங்களை வழங்குகிறார். இதனை தொடர்ந்து திருச்சியில் நடக்கும் பல்வேறு நிகழ்ச்சிகளில் பிரதமர் கலந்து கொள்கிறார். இதற்காக அவர் தனி விமானம் மூலம் திருச்சி விமான நிலையத்திற்கு வருகிறார். பிரதமர் வருகையை முன்னிட்டு திருச்சி முழுவதும் பலத்த பாதுகாப்பு ஏற்பாடுகள் மேற்கொள்ளப்பட்டுள்ளன. இதனால் ஆயிரத்திற்கும் மேற்பட்ட போலீசார் பாதுகாப்பு பணியில் ஈடுபடுத்தப்படுகின்றனர். இதற்காக பல்வேறு மாவட்டங்களில் இருந்து போலீசார் திருச்சிக்கு சென்றுள்ளனர். அதன்படி, சேலம் மாநகர் மற்றும் மாவட்ட காவல்துறை சார்பில் 250 போலீசார் திருச்சிக்கு பிரதமர் பாதுகாப்பு பணிக்காக சென்றுள்ளனர். மாநகரை பொறுத்தவரையில் போலீஸ் துணை கமிஷனர் பிருந்தா தலைமையில் 3 உதவி கமிஷனர்கள், 5 இன்ஸ்பெக்டர்கள் உள்பட 155 போலீசாரும், மாவட்ட போலீசில் 3 துணை போலீஸ் சூப்பிரண்டுகள் தலைமையில் 5 இன்ஸ்பெக்டர்கள் உள்பட 95 பேரும் திருச்சிக்கு பிரதமர் பாதுகாப்பு பணிக்கு சென்றுள்ளதாக போலீஸ் அதிகாரிகள் தெரிவித்தனர்.