சேலம் ரெயில் நிலையத்தில் காப்பர் ஒயர் திருடிய 6 பேர் கைது
சேலம் ரெயில் நிலையத்தில் காப்பர் ஒயர் திருடிய 6 பேரை கைது செய்த போலீசார் அவர்களிடமிருந்து 80 கிலோ காப்பர் ஒயர்களை பறிமுதல் செய்தனர்.
கைது செய்யப்பட்டவர்கள்
சேலம் ரெயில் நிலைய எலக்ட்ரிக்கல் பிரிவு அலுவலக பகுதியில் வைத்திருந்த 80 கிலோ காப்பர் ஒயர் கடந்த 10 நாட்களுக்கு முன்பு திருட்டு போனது. இதுகுறித்து சேலம் ரெயில்வே பாதுகாப்பு படை போலீசார் வழக்குப்பதிவு செய்து விசாரணை நடத்தி வந்தனர், இதனையடுத்து காப்பர் ஒயர்களை திருடியவர்களை கண்டு பிடிக்க ரெயில்வே தனிப்படையினர் தீவிர விசாரணை நடத்தி வந்தனர்.
விசாரணையில் 80 கிலோ காப்பர் ஒயர்களை திருடியது சேலம் தாதம்பட்டி காந்தி நகர் பகுதியைச் சேர்ந்த கோவிந்தராஜ் (வயது 47), வாழப்பாடி நீர்முள்ளிக்குட்டையை சேர்ந்த செல்வம் (32), அம்மாபேட்டை நஞ்சம்பட்டியை சேர்ந்த சங்கர் (33), கனகராஜ் (32), அம்மாபேட்டை சித்தேஸ்வரா பகுதியை சேர்ந்த மலரவன் (30), சதீஷ்குமார் (32) ஆகியோர் என தெரியவந்தது. இதையடுத்து அவர்கள் 6 பேரையும் தனிப்படை போலீசார் கைது செய்தனர். மேலும் அவர்களிடம் இருந்த 80 கிலோ காப்பர் ஒயர்களும் பறிமுதல் செய்யப்பட்டன.