மருத்துவமனையில் தந்தையை பார்த்துவிட்டு திரும்பியவருக்கு காத்திருந்த அதிர்ச்சி!

கோவை: ஒண்டிப்புதூர் காமாட்சிபுரம் கம்போடியா மில் பகுதியைச் சேர்ந்த தண்டபாணி என்பவரின் மகன் அனந்தகிருஷ்ணன். காளப்பட்டி பகுதியில் உள்ள இன்போசிஸ் நிறுவனத்தில் மென்பொருள் பொறியாளராக பணியாற்றி வருகிறார். இவரது தந்தை தண்டபாணி உடல்நிலை சரியில்லாத காரணத்தால் அவிநாசி சாலையில் உள்ள ஜி.கே.என்.எம் மருத்துவமனையில் அனுமதிக்கப்பட்டிருந்த நிலையில் அவரை காண அனந்தகிருஷ்ணன் சென்றுள்ளார். இருசக்கர வாகனத்தில் மருத்துவமனைக்கு சென்றவர் எதிரே உள்ள பள்ளி அருகில் தனது வாகனத்தை பூட்டாமல் நிறுத்தி விட்டு தந்தையை காண சென்றுள்ளார். பின்னர் திரும்பி வந்த பார்த்தபோது தனது இருசக்கர வாகனம் நிறுத்தபட்ட இடத்தில் இல்லாதை கண்டவர் அருகில் உள்ள பகுதிகளில் தேடிப் பார்த்துள்ளார். வாகனம் திருடப்பட்டுள்ளதை அறிந்த அனந்தகிருஷ்ணன் இதுகுறித்து பந்தய சாலை காவல் நிலையத்தில் அளித்த புகாரின் பேரில் வழக்கு பதிவு செய்த போலீசார் விசாரணை மேற்கொண்டு வருகின்றனர். இதேபோல் கோவை மாநகர் பகுதியில் பல்வேறு இடங்களில் ஏழு வாகனங்கள் திருடு போயுள்ளது. தினமும் இரு வாகன திருட்டின் எண்ணிக்கை அதிகரித்து வருவதால் பொதுமக்கள் அச்சம் அடைந்துள்ளனர்.