எடப்பாடி பழனிசாமி தலைமையில் தான் அதிமுக இயங்கும்’- செங்கோட்டையன்

எடப்பாடி பழனிசாமி தலைமையில் தான் அதிமுக இயங்கும் என காஞ்சிபுரத்தில் நடந்த விழாவில் செங்கோட்டையன் கூறினார். தமிழகத்தில் ஏற்பட்டுள்ள கோடை வெப்பத்தை தணிக்கும் வகையில் அதிமுக சார்பில் தமிழக முழுவதும் தண்ணீர் பந்தல் திறக்கப்பட்டு வருகிறது. அவ்வகையில் காஞ்சிபுரம் மாவட்ட அதிமுக சார்பில் கடந்த 10 தினங்களாகவே நீர் மோர் பந்தல்கள் திறக்கப்பட்டு வருகிறது. இந்நிலையில் மாநில எம்ஜிஆர் மன்ற செயலாளர் காஞ்சி பன்னீர் செல்வம் ஏற்பாட்டின் பேரில், காஞ்சிபுரம் மாவட்ட ஆட்சியர் அலுவலகம் அருகே அமைக்கப்பட்ட தண்ணீர் பந்தலை அதிமுக முன்னாள் அமைச்சர் செங்கோட்டையன் திறந்து வைத்து பொது மக்களுக்கு பழங்கள், குளிர்பானங்கள் வழங்கினார். இந்நிகழ்ச்சியில் மாவட்ட அதிமுக செயலாளர் சோமசுந்தரம் , கழக அமைப்பு செயலாளர்கள் வாலாஜாபாத் கணேசன், மைதிலி திருநாவுக்கரசு உள்ளிட்ட கட்சி நிர்வாகிகள் கலந்து கொண்டனர். இதன்பின் செய்தியாளர்களிடம் பேசிய செங்கோட்டையன் , அமைச்சர் ரகுபதி நாடாளுமன்ற தேர்தல் முடிவுக்கு பின் அதிமுக பிளவுபடும் என கூறிய கருத்துக்கு பதில் அளித்தார். அப்போது அவர் கூறுகையில் முன்னாள் முதல்வரும் தற்போதைய பொதுச் செயலாளருமான எடப்பாடி பழனிசாமி தலைமையில் தான் அதிமுக இயங்கும் எனவும் , எந்த சலசலப்பு பிளவுக்கும் இடமில்லை என தெரிவித்தார். மேலும் ஒவ்வொரு தொண்டனும் அதிமுகவின் தூண்களாக விளங்கி வரும் நிலையில் அவர்களை அரவணைத்து செல்வது தங்களைப் போன்ற மூத்த உறுப்பினர்களின் செயலாகும் எனவும் தெரிவித்தார். இந்நிகழ்ச்சியில் அ.தி.மு.க. மாவட்ட நிர்வாகிகள் ஒன்றிய, பேரூர் கழக நிர்வாகிகள் என பலர் கலந்து கொண்டனர்.