கார் மீது ஆட்டோ மோதி விபத்து

அரக்கோணத்தில் உள்ள தனியார் மெட்ரிக் பள்ளியில் படிக்கும் மாணவர்கள் ஆட்டோவில் வீட்டுக்கு சென்று கொண்டிருந்தனர். அம்மனூர் - மேல்பாக்கம் இடையே சென்றபோது எதிரே வந்த காரின் மீது ஆட்டோ மோதியது. இதில் ஆட்டோ முன்பகுதி முழுவதும் நொறுங்கி சேதமடைந்தது. இதில் மாணவர்களின் அலறல் சத்தம் கேட்டு அப்பகுதி மக்கள் விரைந்து வந்து படுகாயம் அடைந்த 3 மாணவர்களை மீட்டு சிகிச்சைக்காக அரக்கோணம் அரசு மருத்துவமனைக்கு அனுப்பி வைத்தனர்.

இதில் அரக்கோணத்தை அடுத்த மேல்பாக்கம் பகுதியை சேர்ந்த 7-ம் வகுப்பு படிக்கும் தமிழினி (வயது 12) என்ற மாணவியும் அவரது தம்பி 5-ம் வகுப்பு படிக்கும் மோனிஷ் (வயது 10) என்ற மாணவனுக்கும் டாக்டர்கள் தொடர்ந்து சிகிச்சை அளித்து வருகின்றனர்.

மேலும் பலத்த காயம் அடைந்த அரக்கோணம் உப்பரபாளையம் பகுதியை சேர்ந்த 8-ம் வகுப்பு படிக்கும் மோனிஷ்ராஜிக்கு (வயது 13) முதலுதவி சிகிச்சை அளிக்கப்பட்டு மேல் சிகிச்சைக்காக அரக்கோணத்தில் உள்ள தனியார் மருத்துவமனையில் சேர்க்கப்பட்டார்.

இந்த விபத்து குறித்து அரக்கோணம் டவுன் போலீசார் வழக்குப்பதிவு செய்து தப்பி ஓடி தலைமறைவான ஆட்டோ டிரைவரை தேடி வருகின்றனர்.