சிற்றோடையில் சிறுவன் உடல் கண்டெடுப்பு

சேலம் மாவட்டம், ஆத்தூர் நகராட்சிக்குட்பட்ட, 18வது வார்டு, பாரதியார் தெரு பகுதியில் கிரைன் பஜார் பகுதிக்கு செல்லும் வழியில் சிற்றோடை குறுக்கே தரைபாலம் உள்ளது. இந்த தரை பாலம் முழுவதும் சேதமாகி உள்ளது. சிற்றோடையில் சிறுவன் உடல் மிதப்பதாக அப்பகுதி பொதுமக்கள், ஆத்தூர் நகர காவல் நிலையத்திற்கு தகவல் தெரிவித்தனர்.

தகவலறிந்து வந்த ஆத்தூர் டி.எஸ்.பி., (பயிற்சி) சரண்யாதேவி தலைமையிலான ஆத்தூர் நகர போலீசார், சிற்றோடையில் இருந்து சிறுவனின் உடலை மீட்டனர். மேலும், இறந்த சிறுவன், 30வது வார்டு, காக்காபாளையம் பகுதியை சேர்ந்தவர், லாரி ஓட்டுனரான முருகேசன் - சாந்தி தம்பதியரின் மகன் மதன் (18) என்பதும், சிறுவனுக்கு வலிப்பு நோய் இருப்பதாகவும் போலீசார்  விசாரணையில் தெரியவந்துள்ளது.

இப்பகுதியில் உள்ள தரைப்பாலத்தை கடக்கும்போது சிறுவனுக்கு வலிப்பு நோய் ஏற்பட்டு கீழே தவறி விழுந்திருக்கலாம் என தெரிவித்தனர். தொடர்ந்து, ஆத்தூர் நகர போலீசார், வழக்கு பதிவு செய்து, விசாரணை நடத்தி வருகின்றனர்.