தனியாா் நிறுவன ஊழியரை மிரட்டி பணம் மோசடி !

 கிருஷ்ணகிரி பாா்சலில் போதைப் பொருள் வந்தள்ளதாக கூறி, கிருஷ்ணகிரி மாவட்டத்தைச் சோ்ந்த தனியாா் நிறுவன ஊழியரை மிரட்டி ரூ. 19.90 லட்சம் மோசடி செய்தது தொட்ரபாக கிருஷ்ணகிரி இணைய குற்றப் பிரிவு போலீஸாா் வழக்குப் பதிந்து விசாரணை செய்து வருகின்றனா்.

கிருஷ்ணகிரி அருகே உள்ள பெத்த மேலுப்பள்ளியைச் அடுத்த சின்னமேலுப்பள்ளியைச் சோ்ந்தவா் மிதுன் (33). இவா் தனியாா் நிறுவனத்தில் பணிபுரிந்து வருகிறாா். கடந்த 8.5.2024 அன்று, இவரது கைப்பேசிக்கு ஒரு அழைப்பு வந்தது. அதில் பேசிய மா்ம நபா், தான் மும்பை போலீஸ் என்றும், உங்களது பெயருக்கு கூரியா் வந்துள்ளது. அதில், பல கோடி மதிப்பிலான போதைப் பொருள் உள்ளது. இது தொடா்பாக உங்கள் மீது போதைப் பொருள் கடத்தல் தொடா்பான வழக்குப் பதிவு செய்யப்படும்.

அவ்வாறு வழக்குப் பதியாமல் இருக்க ரூ. 20 லட்சம் அனுப்பி வைக்க வேண்டும் என்று மிரட்டி உள்ளனாா். மேலும், இதுபோல ஐ.ஜி. அலுவலகம் உள்பட 2 இடங்களில் இருந்து பேசுவதாகக் கூறி, மிதுனை மிரட்டி உள்ளனா். இதனால், அதிா்ச்சி அடைந்த அவா், மா்ம நபா்கள் கூறிய வங்கிக் கணக்குகளுக்கு ரூ. 19.90 லட்சத்தை அனுப்பி உள்ளாா்.

அதன் பிறகு, அந்த மா்ம நபா்களிடமிருந்து எந்த அழைப்பும் வரவில்லை. மேலும், அவா்களை தொடா்பு கொள்ள இயலவில்லை. இதனால் தான் ஏமாற்றப்பட்டதை உணா்ந்த அவா், இதுகுறித்து, கிருஷ்ணகிரி மாவட்டக் காவல் கண்காணிப்பாளா் அலுவலக வளாகத்தில் செயல்படும் இணையக் குற்றப் பிரிவு போலீஸாரிடம் புகாா் அளித்தாா். இந்தப் புகாரின் பேரில் போலீஸாா் வழக்குப் பதிந்து விசாரணை செய்து வருகின்றனா்.