கடலில் தவறி விழுந்த மீனவர் பலி - தூத்துக்குடியில் சோகம்!

தூத்துக்குடி மினிசகாயபுரத்தைச் சேர்ந்தவர் பிரான்சிஸ் மகன் சேசு (26). மீனவரான இவர் நேற்று காலையில் தூத்துக்குடி மீன்பிடி துறைமுகத்தில் உள்ள விசைப்படகில் பராமரிப்பு பணியில் ஈடுபட்டு இருந்தார். அப்போது சேசு எதிர்பாராதவிதமாக கடலில் தவறி விழுந்தார். இதில் தண்ணீரில் மூழ்கிய அவருக்கு மூச்சுத்திணறல் ஏற்பட்டதால் பரிதாபமாக இறந்தார்.

இதனைப் பார்த்து அதிர்ச்சி அடைந்த சக மீனவர்கள் தீயணைப்பு நிலையத்துக்கும், கடலோர பாதுகாப்பு குழும போலீசாருக்கும் தகவல் தெரிவித்தனர். உடனே தீயணைப்பு வீரர்கள் விரைந்து சென்று, கடலில் மூழ்கி இறந்த சேசுவின் உடலை மீட்டனர். அவரது உடலை தருவைகுளம் கடலோர பாதுகாப்பு குழும போலீசார் கைப்பற்றி பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர். மேலும் இதுகுறித்து வழக்குப்பதிவு செய்து விசாரணை நடத்தி வருகின்றனர்.