இரும்பு கம்பியால் தாக்கிய கணவர் கைது

சேலத்தில் காதலித்து திருமணம் செய்து கொண்ட மனைவி மீது சந்தேகம் அடைந்த வாலிபர் இரும்பு கம்பியால் தாக்கினார். சேலம் கிச்சிப்பாளையம் முருககவுண்டர் காடு 3வது கிராஸ் பகுதியை சேர்ந்தவர் சத்தியமூர்த்தி(30). கூலித்தொழிலாளி. இவரது மனைவி சிந்து(21). இருவரும் காதலித்து திருமணம் செய்து கொண்டனர். இவர்களுக்கு ஒன்றரை வயதில் பெண் குழந்தை உள்ளது. குடிபழக்கம் கொண்ட சத்தியமூர்த்தி, தினமும் குடித்துவிட்டு வந்து மனைவியிடம் தகராறில் ஈடுபடுவார். நேற்றுமுன்தினம் அருகில் உள்ள மளிகை கடைக்கு சென்றுவிட்டு சிந்து வீட்டிற்கு வந்துகொண்டிருந்தார். அப்போது அங்கு வந்த சத்தியமூர்த்தி, மனைவி மீது சந்தேகம் அடைந்து தகராறு செய்ததுடன், இரும்பு கம்பியால் தலையில் தாக்கினார். இதில் பலத்த காயம் அடைந்த சிந்து, சேலம் அரசு மருத்துவமனையில் அனுமதிக்கப்பட்டார். இதுகுறித்து கிச்சிப்பாளையம் போலீசார் வழக்கு பதிவு செய்து சத்தியமூர்த்தியை கைது செய்தனர்.