சமுதாய கழிப்பிடத்தை பயன்பாட்டிற்கு விடணும் !

காஞ்சிபுரம் ஒன்றியம், அய்யங்கார்குளத்தில் உள்ள சஞ்சீவிராயர் கோவிலுக்கு தினமும் உள்ளூர், வெளியூரில் இருந்தும் நுாற்றுக்கணக்கான பக்தர்கள் வந்து செல்கின்றனர். கோவிலுக்கு வரும் பக்தர்கள் இயற்கை உபாதை கழிக்க கழிப்பறை வசதி வேண்டும் என்ற பக்தர்களின் கோரிக்கை வலியுறுத்தி வந்தனர்.

இந்நிலையில், ஊரக வளர்ச்சி மற்றும் ஊராட்சி துறை சார்பில், துாய்மை பாரத இயக்கம் 2021 - -22ன் திட்டத்தின் கீழ், கோவில் அருகில் சமுதாய கழிப்பறை வளாகம் கட்டப்பட்டது. திறப்பு விழா நடத்தியும், பக்தர்களின் பயன்பாட்டிற்கு கொண்டு வரப்படாமல் கழிப்பறை கட்டடம் பூட்டியே கிடக்கிறது. இதனால், கழிப்பறை இருந்தும் பக்தர்கள் பயன்படுத்த முடியாத நிலை உள்ளது. இந்நிலையில், அய்யங்கார்குளம் சஞ்சீவிராயர் கோவிலில், நாளை, சித்ரா பவுர்ணமி உற்சவம் நடக்கிறது.

இதில், உள்ளூர் மற்றும் வெளியூரில் இருந்து ஆயிரக்கணக்கான பக்தர்கள் பங்கேற்க உள்ளனர். பக்தர்களின் நலன் கருதி, பூட்டிக் கிடக்கும் சமுதாய கழிப்பறையை திறந்து பயன்பாட்டிற்கு கொண்டு வர ஊராட்சி நிர்வாகம் நடவடிக்கை எடுக்க வேண்டும் என, கோரிக்கை எழுந்துள்ளது."