நாமக்கல்லில் ஈஷா யோகா மையம் சாா்பில் மகா சிவராத்திரி விழா !

கோவை, வெள்ளியங்கிரி மலைச் சாரலில் அமைந்துள்ள ஈஷா யோகா மையம், தனிமனித ஆன்மிக வளா்ச்சியை நோக்கமாகக் கொண்டு செயல்படுகிறது. ஒவ்வொரு ஆண்டும் இங்கு மகா சிவராத்திரி விழா கோலாகலமாக கொண்டாடப்பட்டு வருகிறது. மகா சிவராத்திரி நாளான வெள்ளிக்கிழமை மாலை 6 மணி முதல் மறுநாள் காலை 6 மணி வரையில் ஆதியோகி திவ்ய தரிசனம், தியானங்கள், அருளுரை, பிரசித்தி பெற்ற கலைஞா்களின் இசை, நடன நிகழ்ச்சிகள் உள்ளிட்டவை நடைபெற்றன. அந்த வகையில், வெள்ளியங்கிரி ஈஷா யோகா மையத்தில் நடைபெற்ற நிகழ்வுகள் நேரலையாக நாமக்கல் - பரமத்தி சாலையில் உள்ள கொங்கு திருமண மண்டபத்தில் ஒளிபரப்பு செய்யப்பட்டது. இதில் திரளான பக்தா்கள் கலந்துகொண்டனா். இருக்கை வசதி, குடிநீா், அன்னதானம், வாகன நிறுத்தம் போன்ற அடிப்படை வசதிகள் செய்யப்பட்டிருந்தன. மகா சிவராத்திரி விழா நேரலையில் பங்கேற்ற பக்தா்களுக்கும், பொதுமக்களுக்கும் ஆதியோகி ருத்ராட்சம் பிரசாதமாக வழங்கப்பட்டன. இதற்கான ஏற்பாடுகளை நாமக்கல் ஈஷா யோகா மைய நிா்வாகிகள் செய்திருந்தனா்.