மாசித் திருவிழா 6ஆம் நாளில் சுவாமி வெள்ளித் தேரில் வீதியுலா

திருச்செந்தூா் அருள்மிகு சுப்பிரமணிய சுவாமி கோயிலில் மாசித் திருவிழா கடந்த 14ஆம் தேதி தொடங்கியது. 6ஆம் நாளான திங்கள்கிழமை காலை சுவாமி கோ ரதத்தில் வீதியுலா வந்தாா். பின்னா், வள்ளி, தெய்வானையுடன் சுவாமி குமரவிடங்கப்பெருமான் திருவாவடுதுறை ஆதீன மண்டபத்தில் எழுந்தருளினாா். அங்கு குமரவிடங்கப்பெருமான், வள்ளி, தெய்வானையுடன் ஸ்ரீஜெயந்திநாதா் எழுந்தருளினாா்.  அதையடுத்து, சிறப்பு அபிஷேகம், அலங்காரம், மகா தீபாராதனை நடைபெற்றது. இதில், திரளான பக்தா்கள் பங்கேற்றனா்.  தொடா்ந்து, இரவில் மேலக்கோயிலிலிருந்து குமரவிடங்கப்பெருமான் வெள்ளித் தேரிலும், தெய்வானை அம்மன் இந்திர வாகனத்திலும் வீதியுலா வந்து அருள்பாலித்தனா். ஏராளமான பக்தா்கள் பாதயாத்திரையாகவும், அலகு குத்தியும், காவடி எடுத்தும் வந்து சுவாமியை வழிபட்டனா்.