மலைக்கோவிலூரில் மழை - மக்கள் மகிழ்ச்சி

. தமிழகத்தில் வளிமண்டல கீழ் அடுக்கு சுழற்சி நிலவுவதால், தமிழக முழுவதும் அனைத்து மாவட்டங்களிலும் லேசானது முதல் கனமான மழை பெய்யும் என சென்னை வானிலை மையம் ஏற்கனவே அறிவிப்பு செய்தது. இதன் அடிப்படையில் தமிழகத்தில் குறிப்பிட்ட மாவட்டங்களில் கனமழையும் ,மற்ற மாவட்டங்களில் மிதமான மழையும் பெய்து வருகிறது.

கரூர் மாவட்டத்திலும் கடந்த சில தினங்களாக மாவட்டத்தின் பல்வேறு பகுதிகளில் ஆங்காங்கே லேசானது முதல் கனமழை மழை பெய்து வருகிறது.  கரூர் மாவட்டம், நாகம்பள்ளி ஊராட்சிக்குட்பட்ட மலைக்கோவிலூர் சுற்றுவட்டார பகுதிகளில் நேற்று மிதமான மழை பெய்தது. இதனால் அங்கு வெப்பம் தணிந்து இதமான சூழல் உருவாகியது. மேலும், இந்த மழை பொதுமக்கள் மற்றும் விவசாயிகளுக்கு பயனுள்ளதாக இருப்பதால், அப்பகுதியைச் சேர்ந்த கிராம மக்கள் மகிழ்ச்சி அடைந்துள்ளனர்.