ஆட்டோ கவிழ்ந்த விபத்தில் 7ம் வகுப்பு பள்ளி மாணவன் பலி..!

காஞ்சிபுரம் மாவட்டம் உத்திரமேரூர் அடுத்துள்ள மல்லியங்கரணை பகுதியில் தனியார் பள்ளி ஒன்று செயல்பட்டு வருகிறது. இந்தப் பள்ளியில் வாடாதவூர் கிராமத்தைச் சேர்ந்த மாணவ, மாணவிகள் கல்வி பயின்று வருகின்றனர். இவர்களுக்கு போதிய பேருந்து வசதி இல்லை என்று கூறப்படுகிறது. இதனால் வாடாதவூரில் இருந்து அந்தப் பள்ளியில் பயிலும் மாணவ, மாணவிகளின் பெற்றோர்கள் ஆட்டோ மூலம் தங்கள் பிள்ளைகளை பள்ளிக்கு அனுப்பி வந்தனர். இந்த நிலையில் இன்று மாலை 5 மணிக்கு பள்ளி முடிந்ததும் ஆட்டோவில் 13 மாணவ மாணவிகள் வாடாதவூர் நோக்கி சென்றதாக கூறப்படுகிறது. அப்போது கடல்மங்கலம் ஏரிக்கரை அருகே ஆட்டோ டிரைவரின் கட்டுப்பாட்டு இழந்து கவிழ்ந்து விபத்துக்குள்ளானது. இதில் ரோஹித் என்ற ஏழாம் வகுப்பு மாணவன் தலையில் பழுத்த காயம் அடைந்து சம்பவ இடத்திலேயே ரத்த வெள்ளத்தில் இறந்ததார். மேலும் ஆட்டோ ஓட்டுனர் உட்பட அதில் பயணம் செய்த மாணவ, மாணவிகள் படுகாயம் அடைந்தனர். அந்தப் பகுதியில் இருந்த பொதுமக்கள் மாணவ மாணவிகளை மீட்டு 108 ஆம்புலன்ஸ் மூலம் உத்திரமேரூர் அரசு மருத்துவமனைக்கு அனுப்பி வைத்தனர்.இதுகுறித்து தகவல் அறிந்த உத்திரமேரூர் போலீசார் சம்பவ இடத்திற்கு சென்று ஆட்டோ ஓட்டுனர் பாலாஜி என்பவரை கைது செய்து வழக்கு பதிவு செய்து விசாரணை மேற்கொண்டு வருகின்றனர். பள்ளி மாணவர் உயிரிழந்ததுடன் அதே கிராமத்தைச் சேர்ந்த 12 மாணவ, மாணவிகள் மருத்துவமனையில் சிகிச்சை பெற்று வரும் சம்பவம் வாடாதவூர் கிராம மக்களிடையே சோகத்தை ஏற்படுத்தி உள்ளது.