கள்ளக்குறிச்சியில் இடைநிலை பதிவு மூப்பு ஆசிரியர்கள் கவன ஈர்ப்பு ஆர்ப்பாட்டம்

இடைநிலை பதிவுமூப்பு ஆசிரியர்கள் இயக்கத்தினர் கோரிக்கைகள் நிறைவேறும் வரை தொடர் போராட்டம் அறிவித்து கள்ளக்குறிச்சி சி.இ.ஓ., அலுவலகம் முன் நேற்று கவன ஈர்ப்பு ஆர்ப்பாட்டம் நடத்தினர். தமிழ்நாடு அரசு தொடக்கப் பள்ளிகளில் பணிபுரிந்து வரும் இடைநிலை ஆசிரியர்கள், சம வேலைக்கு சம ஊதியம் கேட்டு தமிழகம் முழுதும் கடந்த 15 ஆண்டுகளாக போராடி வருகின்றனர்.

தி.மு.க., அரசு இடைநிலை ஆசிரியர்களின் கோரிக்கைகள் நிறைவேற்றப்படும் என அளித்த தேர்தல் வாக்குறுதியை நிறைவேற்றக் கோரி, சென்னை டி.பி.ஐ., வளாகத்தில் ஆசிரியர்கள் கடந்த 7 நாட்களாக தொடர் போராட்டத்தில் ஈடுபட்டு வருகின்றனர்.

கள்ளக்குறிச்சியில் சி.இ.ஓ., அலுவலகம் முன் மாவட்ட தலைவர் ரெக்ஸ்ஆனந்த், செயலாளர் பெலிக்ஸ் உதயராஜன், பொருளாளர் அந்தோணி அமலச்சந்திரன், துணைத் தலைவர்கள் மாரிமுத்து, இளவரசி, துணைச் செயலாளர் ரமேஷ் ஆகியோர் தலைமையில் 300க்கும் மேற்பட்டோர் பணிகளை புறக்கணித்து நேற்று கவன ஈர்ப்பு ஆர்ப்பாட்டம் நடத்தினர்