நாமக்கல்லில் வேளாண் துறை சாா்பில், கருத்தரங்கம்

நாமக்கல் மாவட்ட ஆட்சியா் அலுவலகத்தில் வேளாண் துறை சாா்பில், பாரம்பரிய இயற்கை விவசாயம் குறித்த கண்காட்சி மற்றும் கருத்தரங்கை மாவட்ட ஆட்சியா் ச.உமா தொடங்கி வைத்தாா்.

இதில், சிறப்பாக சாகுபடி செய்த விவசாயிகளுக்கு பரிசு, பாராட்டுச் சான்றிதழ்களை வழங்கி அவா் பேசியதாவது. வேளாண் துறை சாா்பில் நவீன தொழில்நுட்பங்களைக் கண்டறிந்து விவசாயத்தை ஊக்குவிக்கும் வகையில், பல்வேறு திட்டங்களை அரசு தொடா்ந்து செயல்படுத்தி வருகிறது.

நாமக்கல் மாவட்ட வேளாண்மைத் துறை மூலம் அங்கக வேளாண்மை மேற்கொள்ளும் விவசாயிகளை ஊக்குவித்திடும் வகையில், பாரம்பரிய வேளாண் வளா்ச்சித் திட்டம் செயல்படுத்தப்பட்டு வருகிறது. இத்திட்டத்தின் முக்கிய நோக்கம் மண்வளத்தை மேம்படுத்துதல் மற்றும் பாரம்பரிய வேளாண் இடுபொருள்களைப் பயன்படுத்தி சாகுபடி மேற்கொள்ளுதல் ஆகும்.

நடப்பு நிதியாண்டில் இத்திட்டத்தின் கீழ் நாமக்கல் மாவட்டத்தில் 540 ஹெக்டோ் பரப்பளவில் ரூ. 48.37 லட்சம் நிதி ஒதுக்கீட்டில் திட்டம் செயல்படுத்தப்பட்டுள்ளது. இத்திட்டத்தின்படி, ஒரு தொகுப்பு குழுவுக்கு தொடா்ந்து மூன்று ஆண்டுகள் அங்ககச் சான்று வழங்கப்படும். குழுவில் உள்ள ஒவ்வொரு விவசாயிக்கும் ஹெக்டேருக்கு தலா ரூ. 12 ஆயிரம் ஊக்கத் தொகை வழங்கப்படுகிறது. குழுக்களின் செயல்பாடுகளை விதைச்சான்று துறை மற்றும் வேளாண்மை துறையுடன் ஒருங்கிணைந்து செயல்பட்டு அங்ககச் சான்று பெறும்வரை தொகுப்பு குழுக்கள் வழிநடத்தப்படுகிறது.

தமிழக அரசின் சாா்பில் செயல்படுத்தப்படும் திட்டங்களை விவசாயிகள் பயன்படுத்திக் கொள்ள வேண்டும் என்றாா். இந்த நிகழ்ச்சியில், மாவட்ட வேளாண் இணை இயக்குநா் சு.துரைசாமி, மாவட்ட ஆட்சியரின் நோ்முக உதவியாளா் (வேளாண்மை) ராமச்சந்திரன், வேளாண்மை துணை இயக்குநா் வணிகம் மற்றும் விற்பனைத் துறை) அ.நாசா், துறை சாா்ந்த அலுவலா்கள் உள்ளிட்டோா் கலந்துகொண்டனா்.