காவல் நிலையத்தில் எஸ்.பி., ஆய்வு

சின்னசேலம் காவல் நிலையத்தில் எஸ்.பி., சமய்சிங்மீனா, நேற்று வருடாந்திர ஆய்வு மேற்கொண்டார். அப்போது, காவல் நிலையத்தில் பராமரிக்கப்படும் தினசரி கோப்புகளை பார்வையிட்டு, நிலுவையில் உள்ள வழக்குகளின் விபரங்களைக் கேட்டறிந்தார். தொடர்ந்து, விபத்து தொடர்பான வழக்குகளில் பறிமுதல் செய்யப்பட்ட வாகனங்களை ஆய்வு முடித்து உரியவர்களிடம் ஒப்படைக்குமாறும், காவலர் குடியிருப்பு கட்டடத்தை துாய்மையாக பராமரிக்குமாறும் போலீசாருக்கு அறிவுறுத்தினார். ஆய்வின்போது, டி.எஸ்.பி., தேவராஜ், இன்ஸ்பெக்டர் அரிகிருஷ்ணன், சப் இன்ஸ்பெக்டர் நரசிம்மஜோதி மற்றும் போலீசார் உடனிருந்தனர்.