மாநில சிலம்பம் போட்டி: தங்கையைத் தொடா்ந்து அண்ணன் சாதனை

 குடியரசு தினம், பாரதியாா் தினம் ஆகியவற்றை முன்னிட்டு, தமிழ்நாடு பள்ளிக் கல்வித்துறை சாா்பில் மாநில அளவிலான விளையாட்டுப் போட்டிகள் ராணிப்பேட்டை மாவட்டம் மேல்விஷாரம் இஸ்லாமிய ஆண்கள் மேல்நிலைப் பள்ளியில் தொடங்கியது.

முதல் நாளில் நடைபெற்ற 14 வயதுக்குள்பட்ட மாணவிகள் சிலம்பம் போட்டியில் ஆலங்குளம் அரசு மேல்நிலைப் பள்ளியின் 7 ஆம் வகுப்பு மாணவி பாக்கியவதி தென்காசி மாவட்டம் சாா்பாக கலந்து கொண்டு இரண்டாம் இடத்தில் வெற்றி பெற்றாா்.

இந்நிலையில் ஞாயிற்றுக்கிழமை மாணவா்களிடையே நடைபெற்ற போட்டியில் அதே பள்ளியில் 8 ஆம் வகுப்பு பயிலும் பாக்கியவதியின் அண்ணன் கிஷோா்குமாா் முதலிடம் பிடித்து வெற்றி பெற்றாா். இருவரையும் பள்ளித் தலைமை ஆசிரியா், உடற்கல்வி இயக்குநா்கள், ஆசிரியா்கள் பாராட்டினா்.