வாலிபரை மிரட்டி பணம் பறித்தவர் கைது

கன்னியாகுமரி மாவட்டம் அஞ்சுகிராமம் அருகே அழகப்பபுரம் பகுதியை சேர்ந்தவர் ஜெலஸ்டின்  திரவியம் மகன் ஆண்டனி வெஸ்டர் (25). எலக்ட்ரிக்கல் கான்ட்ராக்டராக வேலை செய்து வருகிறார். நேற்று மாலை சுமார் ஆறு மணி அளவில் தனது நண்பருடன் இருசக்கர வாகனத்தில் அழகப்பபுரம் ஊருக்கு பின்புறம் உள்ள மீன் சந்தை அருகே சென்று கொண்டிருந்தார்.       அப்போது பொட்டல் குளத்தை சேர்ந்த சந்துரு (23)என்பவர் வழிமறித்து குடிப்பதற்கு பணம் கேட்டுள்ளார். அதற்கு ஆண்டனி வெஸ்டர் பணம் தர முடியாது என கூறியுள்ளார். இதனால் ஆத்திரமடைந்த சந்துரு  அறிவாளை காட்டி மிரட்டி சட்டை பையில் இருந்த 1100 ரூபாய் எடுத்துச் சென்றுள்ளார்.  இது தொடர்பாக ஆன்டனி அஞ்சு கிராமம் போலீஸ் நிலையத்தில் புகார் அளித்தார். போலீசார் வழக்கு பதிவு செய்து சந்துருவை கைது செய்து விசாரித்து வருகின்றனர்.