ரயில் பயணிகளிடம் தகராறு செய்து கொலை மிரட்டல் - சிறுவன் உட்பட 2 பேர் கைது

சென்னையில் இருந்து ஆலப்புழா சென்ற ரயிலில் நேற்று மணிகண்டன் என்பவர் கோவை நோக்கி சென்று கொண்டிருந்தார். ரயில் திருப்பூர் ரயில் நிலையம் அருகே வந்தபோது ரயிலில் பயணித்த இளைஞர்கள் சிலர் மது போதையில் மணிகண்டன் உடன் வாக்குவாதத்தில் ஈடுபட்டுள்ளனர். மேலும் இதனை தடுக்க முயன்ற பெண் மற்றும் பயணிகளிடம் தகாத முறையில் பேசி கொலை மிரட்டல் விடுத்தனர்.

இதனை அங்கிருந்த சக பயணிகள் வீடியோவாக எடுத்து சமூக வலைதளங்களில் பதிவிட்டனர். மேலும் மணிகண்டன் மற்றும் பயணிகள் கோவை ரயில் நிலையத்தில் இருப்பு பாதை காவல் நிலையத்தில் புகார் அளித்தனர். வீடியோ வைரலான நிலையில் சம்பவம் குறித்து விசாரித்து கைது செய்ய திருப்பூர் காவல் நிலையத்தை அணுகினர். இதனை அடுத்து விசாரணையில் இறங்கிய திருப்பூர் வடக்கு காவல்துறையினர் கோல்டன் நகர் பகுதியைச் சேர்ந்த அசோக் 20 மற்றும் 17 வயது சிறுவன் என இரண்டு பேரை கைது செய்து திருப்பூர் இருப்பு பாதை காவல் நிலையத்தில் ஒப்படைத்தனர். மேலும் இந்த வழக்கில் தொடர்புடைய இரண்டு பேரை தேடி வருகின்றனர். கைது செய்யப்பட்ட இருவரிடமும் விசாரணை மேற்கொள்ளப்பட்டு வருகிறது.