விக்கிரவாண்டி அருகே ஆட்டோவில் புகையிலை கடத்தியவர் கைது

விழுப்புரம் மாவட்டம் விக்கிரவாண்டி காவல் நிலைய ஆய்வாளர் பாண்டியன் தலைமையிலான போலீசார் நேற்று மாலை விக்கிரவாண்டி அங்காளம்மன் கோவில் அருகே வாகன சோதனையில் ஈடுபட்டிருந்தனர். அப்போது புதுச்சேரி மார்க்கத்தில் இருந்து வந்த ஆட்டோவை தடுத்து நிறுத்தி போலீசார் சோதனை செய்தபோது, அதில் அரசால் தடை செய்யப்பட்ட புகையிலை பொருட்களான ஹான்ஸ் உள்ளிட்ட பல்வேறு வகையான பாக்கெட்டுகள் இருந்தது கண்டுபிடிக்கப்பட்டது. இதையடுத்து ஆட்டோவை ஓட்டி வந்த நபரிடம் நடத்திய விசாரணையில், அவர் புதுச்சேரி மாநிலம் கூனிச்சம்பட்டை சேர்ந்த ஏகநாதன் (வயது 54) என்பதும், ஹான்ஸ் உள்ளிட்ட புகையிலை பொருட்களை கடத்தி வந்து கடைகளுக்கு விற்பனை செய்ய முயன்றதும் தெரியவந்தது. அதைத்தொடர்ந்து போலீசார், ஏகநாதனை கைது செய்தனர். மேலும் அவரிடமிருந்து 50 கிலோ புகையிலை பொருட்கள் மற்றும் அதனை கடத்த பயன் படுத்தப்பட்ட ஆட்டோ பறிமுதல் செய்யப்பட்டது.