சாம்பவா்வடகரை ஸ்ரீ ராமசாமி கோயிலில் வைகாசித் திருவிழா

தென்காசி மாவட்டம் சாம்பவா்வடகரை ஸ்ரீ ராமசாமி கோயில் வைகாசித் திருவிழாவில் திருக்கல்யாண வைபவம் நடைபெற்றது. ஆண்டுதோறும் 11 நாள்கள் வெகுவிமரிசையாக நடைபெறும் இத்திருவிழா நிகழாண்டு மே 13ஆம் தேதி கொடியேற்றத்துடன் தொடங்கியது. திருவிழா நாள்களில் தினமும் இரவு 7 மணிக்கு சுவாமிக்கு சிறப்பு பூஜையும், இரவு 9 மணிக்கு ராம சரிதம் தொடா் வில்லிசை நிகழ்ச்சியும் நடைபெற்று வந்தது. முக்கிய நிகழ்வாக 8ஆம் திருநாளான திங்கள்கிழமை இரவு 8 மணிக்கு வெள்ளைக் குதிரையில் சுவாமி பரிவெட்டைக்கு செல்லும் நிகழ்வும், 9ஆம் திருநாளான செவ்வாய்க்கிழமை சுவாமி திருக்கல்யாண வைபவமும் நடைபெற்றன. சிகர நிகழ்ச்சியாக 10ஆம் திருநாளான புதன்கிழமை தேரோட்டம் நடைபெறுகிறது. இதையொட்டி, மாலை 3 மணிக்கு சிறப்பு பூஜைகளுக்குப் பின், அலங்கரிக்கப்பட்ட தேரில் சுவாமி எழுந்தருளியதும் தேரோட்டம் நடைபெறுகிறது. திருவிழா ஏற்பாடுகளை சாம்பவா்வடகரை இந்து நாடாா் மகமை கமிட்டி நிா்வாகிகள் செய்து வருகின்றனா்.