வாகனம் மோதி இளைஞர் படுகாயம்

வடக்கு பாளையத்தில் எலக்ட்ரிக் பைக் மீது அடையாளம் தெரியாத வாகனம் மோதி இளைஞன் படுகாயம். கரூர் மாவட்டம், கிருஷ்ணராயபுரம் தாலுகா, கருப்பூர், சாலப்பட்டி பகுதியைச் சேர்ந்தவர் குணசேகரன் மகன் ஆதித்யன் வயது 18. இவர் மே 22 ஆம் தேதி அதிகாலை 4:30 மணி அளவில் கரூர் - திருச்சி சாலையில் அவருக்கு சொந்தமான எலக்ட்ரிக் டூவீலரில் சென்று கொண்டிருந்தார். இவரது வாகனம் வடக்குபாளையம், கவின் பேக்கரி அருகே சென்றபோது, அதே சாலையில் பின்னால் வேகமாக வந்த அடையாளம் தெரியாத நான்கு சக்கர வாகனம் ஒன்று, ஆதித்யன் ஓட்டிச் சென்ற டூவீலர் மீது மோதி விட்டு, மின்னல் வேகத்தில் நிற்காமல் சென்று விட்டது.

இந்த விபத்தில் வாகனத்துடன் கீழே விழுந்த ஆதித்தனுக்கு தலையில் பலத்த காயம் ஏற்பட்டு, உடனடியாக அவரை மீட்டு, தனியார் ஆம்புலன்ஸ் மூலம் கோவையில் உள்ள அரசு மருத்துவக் கல்லூரி மருத்துவமனையில் சிகிச்சைக்காக அனுமதித்தனர். இந்த சம்பவம் அறிந்த ஆதித்தியனின் தந்தை குணசேகரன் அளித்த புகாரின் பேரில், சம்பவ இடத்திற்கு சென்று விசாரணை மேற்கொண்ட காவல்துறையினர், ஆதித்யன் ஓட்டிய வாகனத்தின் மீது மோதி விட்டு நிற்காமல் சென்ற வாகனம் எது? அதன் ஓட்டுனர் யார்? என்ற கோணத்தில் வழக்கு பதிவு செய்து விசாரணை மேற்கொண்டு வருகின்றனர் பசுபதிபாளையம் காவல்துறையினர்.