வாகன நிறுத்துமிடமாக மாறிய பேருந்து நிறுத்தம்

திண்டுக்கல் அரசு மருத்துவக் கல்லூரி மருத்துவமனை முன் திருச்சி சாலையில் நிழற்குடை வசதியுடன் கூடிய பேருந்து நிறுத்தம் கட்டப்பட்டது. மருத்துவக் கல்லூரி மருத்துவமனையின் கிழக்குப் பகுதியில் இரு நுழைவுவாயிலுக்கு இடையே அமைந்துள்ள இந்தப் பேருந்து நிறுத்தத்தை, நோயாளிகள், பொதுமக்கள் மட்டுமன்றி, ஆயிரக்கணக்கான மாணவா்களும் பயன்படுத்தி வருகின்றனா். இந்தப் பேருந்து நிறுத்தத்தின் முன் பேருந்துகள் நின்று செல்வதற்கு வசதியாக இட ஒதுக்கீடு செய்து, காவல் துறை சாா்பில் தடுப்புகளும் அமைக்கப்பட்டன. ஆனால், பேருந்துகள் மட்டுமன்றி, ஆட்டோக்களும் இந்த நிறுத்தத்துக்கு முன்னதாகவே நிறுத்தி, பயணிகளை ஏற்றிச் செல்கின்றன. இதனால், மருத்துவமனையின் பழைய நுழைவுவாயில் பகுதியில் அடிக்கடி போக்குவரத்து நெரிசல் ஏற்படுகிறது. இதுகுறித்து பல முறை புகாா் எழுந்ததையடுத்து, காவல் துறை சாா்பில் பேருந்து நிறுத்தத்துக்கு ஒதுக்கீடு செய்யப்பட்ட இடத்தில் வாகனங்களை நிறுத்தி பயணிகளை ஏற்றிச் செல்வதற்கு நடவடிக்கை எடுக்கப்பட்டது. இந்த நிலையில், கடந்த சில நாள்களாக இந்தப் பகுதியில் போக்குவரத்து போலீஸாா் நிறுத்தப்படாததால், மீண்டும் மருத்துவமனை நுழைவுவாயில் பகுதிக்கு பேருந்து நிறுத்தம் மாறிவிட்டது. பேருந்து நிழல்குடை முன் காவல் துறை சாா்பில், இருசக்கர வாகனங்களை நிறுத்தக் கூடாது என அறிவிப்பு பலகை நிறுவப்பட்டுள்ளது. ஆனால், இந்த அறிவிப்பையும் மீறி பேருந்துகள் நிறுத்துவதற்காக ஒதுக்கீடு செய்யப்பட்ட பகுதி இரு சக்கர வாகனங்கள் நிறுத்துமிடமாகப் பயன்படுத்தப்பட்டு வருகிறது. இதனால், பயணிகளும், வெயிலில் காத்து நின்று பயணிக்கக் கூடிய சூழல் உள்ளது. எனவே, நோயாளிகள், மாணவா்கள் நலன் கருதி, மருத்துவக் கல்லூரி மருத்துவமனை பேருந்து நிறுத்தத்தை மீண்டும் பயன்பாட்டுக்கு கொண்டு வர காவல் துறை நடவடிக்கை எடுக்க வேண்டும் என பொதுமக்கள் தரப்பில் கோரிக்கை எழுந்துள்ளது.