பேராவூரணியில் பைக்குகள் மோதல்: ஒருவர் பலி

தஞ்சாவூர் மாவட்டம், பேராவூரணி அருகே உள்ள மதன்பட்டவூர் கிராமத்தைச் சேர்ந்தவர் விவசாயி கவின்ராஜ் (55), இவரது மனைவி உமா (50), இருவரும் பேராவூரணிக்கு ஏடிஎம்மில் பணம் எடுப்பதற்காக வந்து விட்டு சனிக்கிழமை இரவு பைக்கில் ஊருக்கு திரும்பி கொண்டிருந்தனர். 

ஆண்டவன் கோவில் பகுதியில் டாஸ்மாக் கடை அருகே, எதிரே வந்த புனல்வாசல் கிராமத்தைச் சேர்ந்த ஆரோக்கிய சேவியர் என்பவர் வந்த பைக்கும் நேருக்கு நேர் மோதிக்கொண்டதில் மூவரும் பலத்த காயமடைந்தனர். அருகில் உள்ளவர்கள் அவர்களை மீட்டு, பேராவூரணி அரசு மருத்துவமனைக்கு அனுப்பி வைத்தனர்.

பேராவூரணியில் முதலுதவி சிகிச்சை அளிக்கப்பட்டு புதுக்கோட்டை மருத்துவக் கல்லூரி மருத்துவமனைக்கு ஒரே ஆம்புலன்ஸில் மூவரும் அனுப்பி வைக்கப்பட்டனர். 

 புதுக்கோட்டை செல்லும் வழியில் கவின்ராஜ் உயிரிழந்தார். ஆரோக்கிய சேவியர், உமா இருவரும் புதுக்கோட்டை மருத்துவக்கல்லூரி மருத்துவமனையில் சிகிச்சை பெற்று வருகின்றனர்.  இது குறித்து பேராவூரணி காவல்துறையினர் வழக்குப் பதிவு செய்து விசாரணை நடத்தி வருகின்றனர்.