ஜனவரி 31-இல் விவசாயிகள்குறைதீா்க்கும் கூட்டம்

திருச்சி மாவட்ட ஆட்சியரகத்தில் புதன்கிழமை (ஜன.31) விவசாயிகள் குறைதீா்க்கும் நாள் கூட்டம் நடைபெறும் என ஆட்சியா் மா. பிரதீப்குமாா் தெரிவித்துள்ளாா். இதுதொடா்பாக, அவா் வெளியிட்டுள்ள செய்திக்குறிப்பு: ஜனவரி மாதத்துக்கான விவசாயிகள் குறைதீா் கூட்டம் வரும் 31ஆம் தேதி காலை 10.30 மணிக்கு மாவட்ட ஆட்சியரக கூட்ட அரங்கில் நடைபெறும். இக் கூட்டத்துக்கு ஆட்சியா் தலைமை வகிக்கிறாா். இக் கூட்டத்தில் விவசாயிகளிடம் இருந்து கடந்த டிசம்பா் மாத கோரிக்கை தினத்தில் பெறப்பட்ட மனுக்களுக்கான பதில்கள் வழங்கப்படும்.

மேலும், விவசாயிகளின் வேளாண் பணிகள் தொடா்பான கோரிக்கைகளுக்கு மாவட்ட ஆட்சியரால் நேரில் பதில் அளிக்கப்படும். இதில், வேளாண்மை தொடா்புடைய கடனுதவிகள், நீா்ப் பாசனம், வேளாண்மை, தொழில்நுட்ப உதவி, இடுபொருள்கள் மற்றும் நலத் திட்டங்களுக்கு மனுக்கள் அளிக்கலாம். திருச்சி மாவட்டத்தைச் சோ்ந்த விவசாய சங்கப் பிரதிநிதிகள், விவசாயிகள், விவசாயத் தொழிலாளா்கள் தவறாமல் பங்கேற்க வேண்டும் என்று ஆட்சியா் தெரிவித்துள்ளாா்.