இளைஞரை கத்தியால் குத்தியவர் கைது

காஞ்சிபுரம் மாவட்டம், ஒரகடம் அடுத்த, வாரணவாசியைச் சேர்ந்தவர் ஆகாஷ், 23. இரு தினங்களுக்கு முன், வாரணவாசியில் இருந்து தொல்லாயி சாலையில் பைக்கில் சென்றார். அப்போது, சரத்பாபு என்பரின் பைக் மீது மோதியதாக கூறப்படுகிறது. இந்த நிலையில், வாரணவாசி சந்திப்பில் ஆகாஷை மடக்கி, சரத்பாபுவின் அண்ணன் தினேஷ் கத்தியால் கழுத்தில் குத்திவிட்டு தப்பினர்.

இதனால், ஆகாஷின் உறவினர்கள் மற்றும் பொதுமக்கள் 100க்கும் மேற்பட்டோர், தினேஷை கைது செய்ய கோரி, வண்டலுார் - வாலாஜாபாத் சாலையில் மறியலில் ஈடுபட்டனர். போலீசார் பேச்சு நடத்தியதையடுத்து, அவர்கள் கலைந்து சென்றனர். இந்த நிலையில், அதே பகுதியைச் சேர்ந்த தினேஷ், 30, என்பவரை ஒரகடம் போலீசார் நேற்று கைது செய்தனர்.