பாபநாசம் : முன்விரோத தகராறில் விவசாயி வெட்டிக் கொலை

 ஒரத்தநாடு அருகே ஆழிவாய்க்கால் கிராமத்தைச் சோ்ந்தவா் ஜெயக்குமாா் (50). விவசாயி. இறால் பண்ணையையும் நடத்தி வந்தாா். இவரது உறவினரான அய்யம்பேட்டை அருகேயுள்ள பசுபதிகோவிலைச் சோ்ந்த செந்திலுக்கும், அதே பகுதியைச் சோ்ந்த சிலருக்கும் இடையே ஒரு வாரத்துக்கு முன்பு தகராறு ஏற்பட்டதாகவும், இதுகுறித்து அய்யம்பேட்டை காவல் நிலையத்தில் செந்தில் கொடுத்த புகாா் மீது நடவடிக்கை எடுக்கப்படவில்லை எனக் கூறப்படுகிறது.

எனவே, செந்திலை ஜெயக்குமாா், இவரது நண்பரான காட்டுக்குறிச்சியைச் சோ்ந்த அன்பரசு மகன் பிரவீன் (28) அழைத்துக் கொண்டு மாவட்டக் காவல் கண்காணிப்பாளா் அலுவலகத்தில் புகாா் அளிக்க திங்கள்கிழமை சென்றனா். அங்கு அய்யம்பேட்டை காவல் நிலையத்தில் புகாா் செய்யுமாறு கூறியடுத்து, ஜெயக்குமாா், செந்தில், பிரவீன் ஆகியோா் அய்யம்பேட்டை காவல் நிலையத்துக்கு நேற்று மாலை சென்று கொண்டிருந்தனா்.

இந்நிலையில், பசுபதிகோவில் பகுதியில் அவா்கள் சென்ற காரை சிலா் வழிமறித்து ஜெயக்குமாா், செந்தில், பிரவீன் ஆகியோரை ஆயுதங்களால் தாக்கினா். இதில், பலத்த காயமடைந்த ஜெயக்குமாா், பிரவீன் தஞ்சாவூா் மருத்துவக் கல்லூரி மருத்துவமனையில் சோ்க்கப்பட்டனா். அங்கு ஜெயக்குமாா் சிகிச்சை பலனின்றி உயிரிழந்தாா். பிரவீன் தொடா்ந்து சிகிச்சை பெற்று வருகிறாா். இதுகுறித்து அய்யம்பேட்டை காவல் நிலையத்தினா் விசாரணை மேற்கொண்டுள்ளனா்.