இரண்டு மொபைல் போன்கள் திருடிய நபர் கைது, போன்கள் பறிமுதல்

நாமக்கல் மாவட்டம் குமாரபாளையம் கலைமகள் தெருவில் வசிப்பவர் முகமது அமீன், 27. மளிகை வியாபாரம். இவர் அக்.8 இரவு 10:00 மணியளவில் வீட்டில் ஜன்னல் ஓரம் தனது இரண்டு மொபைல் போன்கள் வைத்து விட்டு தூங்க சென்றார். மறுநாள் காலை 06:00 மணியளவில், எழுந்து பார்த்த போது, ஜன்னல் ஓரம் வைத்த மொபைல் போன்கள் காணவில்லை. முதல் நாள் வீட்டிற்கு சுண்ணாம்பு அடிக்க வந்த, அதே வீதியை சேர்ந்த மணி என்ற நபர் மீது சந்தேகம் எழுந்தது. நேற்று காலை 11:00 மணியளவில் குமாரபாளையம் பஸ் ஸ்டாண்ட் அருகே உள்ள தனது மளிகை கடை எதிரில், மணி நின்று கொண்டிருக்க, அவனை பிடித்து சோதனை செய்த முகமது அமீன், அவனிடம் மேல் சட்டையில் இரண்டு ஆண்டராய்டு மொபைல் போன்களும், டிராயரில் இரண்டு ஆண்டராய்டு மொபைல் போன்களும், ஆக மொத்தம் நான்கு மொபைல் போன்கள் இருந்தது தெரியவந்தது. அதில் இரண்டு மொபைல் போன்கள் தனதுதான் என்பது உறுதியானது. இது குறித்து குமாரபாளையம் போலீசில் முகமது அமீன் புகார் செய்ய, மணி (எ) மணிகண்டன், 43, என்பவரை போலீசார் கைது செய்தனர். அவனிடம் உள்ள நான்கு போன்கள் பறிமுதல் செய்யப்பட்டன.