தமிழ்நாடு காங்கிரஸ் சார்பில், வீரபாண்டிய கட்டபொம்மன் மற்றும் வேலுநாச்சியார் பிறந்தநாள் நிகழ்ச்சி சென்னை சத்தியமூர்த்தி பவனில் நேற்று நடைபெற்றது. இதில் கட்சியின் மாநிலத் தலைவர் செல்வப்பெருந்தகை பங்கேற்று, இருவரின் உருவப்படங்களுக்கு மாலை அணிவித்து, மலர்தூவி மரியாதை செலுத்தினார். பின்னர் செய்தியாளர்களிடம் அவர் கூறியதாவது: தமிழ்நாடு காங்கிரஸ் நிர்வாக சீரமைப்புப் பணிகள் தொடங்கியுள்ளன. இதற்காக மாவட்ட, மாநில பொறுப்புகளுக்கு, கட்சி நிர்வாகிகள் இணையவழியில் விண்ணப்பிக்கலாம். வரும் 15 நாட்களுக்கு விருப்ப மனுக்கள் பெறப்படும். இந்த மனுக்களை பரிசீலிக்க குழு அமைக்கப்பட்டு, பின்னர் நிர்வாகிகள் பட்டியல் தேசிய தலைமைக்கு பரிந்துரை செய்யப்படும். படத்திறப்பு நிகழ்ச்சி: மறைந்த முன்னாள் பிரதமர் மன்மோகன் சிங், முன்னாள் மத்திய அமைச்சர் ஈவிகேஎஸ் இளங்கோவன் ஆகியோரின் உருவப்பட திறப்பு நிகழ்ச்சி சென்னை தேனாம்பேட்டையில் உள்ள காமராஜர் அரங்கில் ஜன.7-ம் தேதி காலை 11 மணிக்கு நடைபெற உள்ளது. முதல்வர் ஸ்டாலின் பங்கேற்று உருவப்படங்களை திறந்துவைக்கிறார். இதில் கூட்டணி கட்சித் தலைவர்கள் பங்கேற்க உள்ளனர். அன்று மாலை ‘நேருவும், அம்பேத்கரும், அரசியலமைப்புச் சட்டமும்’ என்ற தலைப்பில் கருத்தரங்கம் நடைபெற உள்ளது. பயிற்சி முகாம்: கிராமம்தோறும் காங்கிரஸின் திட்டங்களை கொண்டுசெல்லும் வகையில் 8-ம் தேதி சத்தியமூர்த்தி பவனில் பயிற்சி முகாம் நடைபெற உள்ளது. தமிழகத்தில் புதிய உள்ளாட்சி அமைப்புகள் உருவாக்கப்பட்டுள்ளன. அதன்படி தமிழகம் முழுவதும் 2 லட்சத்து 63 ஆயிரத்து 790 நிர்வாகிகளை நியமிக்க வேண்டியுள்ளது. கிராம, நகர கமிட்டிகளை வலிமைப்படுத்தும் நிர்வாகிகள் உள்ளாட்சி, எம்எல்ஏ, எம்.பி தேர்தல்களில் முதன்மையாக பரிந்துரைக்கப்படுவார்கள். புதியவர்களுக்கு கட்சியில் பொறுப்புகள் அளிக்கப்படும். தமிழகத்தில் 500 அரசுப் பள்ளிகளை தனியாரிடம் ஒப்படைக்கும் முடிவை தமிழக அரசு கைவிட வேண்டும். பொங்கல் திருநாளில் குடும்ப அட்டைக்கு ரூ.1000 ஆயிரம் வழங்க வேண்டும். அண்ணா பல்கலைக்கழக விவகாரத்தில் குற்றவாளியின் செல்போனில் இடம்பெற்ற தரவுகள் அடிப்படையில் சிறப்பு குற்றப்புலனாய்வு விசாரணை நடத்தி வருகிறது. இந்த விசாரணையில் எந்த சாரும் தப்ப முடியாது. பல்கலைக்கழக விவகாரத்தை அரசியலாக்கக் கூடாது என அவர் கூறினார். இந்நிகழ்ச்சியில் கட்சியின் மூத்த தலைவர்கள் கே.வீ.தங்கபாலு, பீட்டர் அல்போன்ஸ், மாநில துணைத்தலைவர்கள் ஆ.கோபண்ணா, சொர்ணா சேதுராமன், சுதா ராமகிருஷ்ணன் எம்.பி உள்ளிட்டோர் கலந்து கொண்டனர்.