சாலையை சீரமைக்க கோரி மக்கள் சாலைமறியல்

பொள்ளாச்சி ஆனைமலையில் இருந்து ஆழியார் செல்லும் பகுதியில் உள்ள கோட்டூர் சாலையை நூற்றுக்கும் மேற்பட்ட வாகன ஓட்டிகள் பயன்படுத்தி வருகின்றனர்.

இந்தப் பாதையில் இரண்டு பெரிய குழிகள் உள்ளதால் அடிக்கடி விபத்துக்கள் ஏற்பட்டு வருகிறது.இது குறித்து கோட்டூர் பேரூராட்சி நிர்வாகத்திடம் இப்பகுதி மக்கள் பலமுறை முறையிட்டும் எந்தவித நடவடிக்கையும் எடுக்காமல் அதிகாரிகள் அலட்சியம் காட்டி வருகின்றனர்.

இந்நிலையில் இப்பகுதியில் உள்ள குழியில் குழந்தையோடு இருசக்கர வாகனத்தில் வந்த நபர் ஒருவர் குழியில் விழுந்து காயம் ஏற்பட்டது.இதனை அடுத்து ஆத்திரமடைந்த அப்பகுதி மக்கள் கோட்டூர் பேரூராட்சி நிர்வாகத்தை கண்டித்து சாலை மறியலில் ஈடுபட்டனர்.

இதனை அடுத்து பேரூராட்சி அதிகாரிகள் பொதுமக்களிடம் பேச்சுவார்த்தை நடத்தி விரைவில் இரு குழிகளை சீரமைத்து தரப்படும் என உறுதி அளித்ததை அடுத்து பொதுமக்கள் கலைந்து சென்றனர்.இதனால் இப்பகுதியில் சிறிது நேரம் போக்குவரத்து பாதிக்கப்பட்டது.