சேலத்தில் இன்று காலைஓடும் பஸ் இருந்து இறங்க முயன்ற தொழிலாளி தவறி விழுந்து சாவு

நாமக்கல் மாவட்டம் பரமத்திவேலூர் பகுதியை சேர்ந்தவர் ஜாபர் சிக்கந்தர் (வயது 48). இவர் சேலம் செவ்வாய்ப்பேட்டையில் உள்ள ஒரு பாத்திர கடையில் வேலை செய்து வந்தார். இவர் இன்று காலை பரமத்தி வேலூரில் இருந்து சேலத்திற்கு ஒரு தனியார் பஸ்சில் வந்தார். கொண்டலாம்பட்டி திவ்யா தியேட்டர் அருகே பஸ் மெதுவாக சென்றது. அப்போது பஸ்சில் இருந்து ஜாபர் சிக்கந்தர் இறங்க முற்பட்டார். இதில் தடுமாறி கீழே விழுந்தார். இதில் பின் தலையில் பலத்த அடிபட்டு சம்பவ இடத்திலேயே பரிதாபமாக இறந்தார். இது குறித்து தகவல் அறிந்த கொண்டலாம்பட்டி போலீசார் சம்பவ இடத்திற்கு சென்று ஜாபர் சிக்கந்தரின் உடலை மீட்டு சேலம் அரசு மருத்துவமனைக்கு அனுப்பி வைத்தனர். மேலும் போலீசார் வழக்குப் பதிவு செய்து விசாரணை நடத்தி வருகிறார்கள்.