தந்தை - மகன் வெட்டிக் கொலை: 4 போ் கைது

தென்காசி மாவட்டம், ஊத்துமலை அருகே செவ்வாய்க்கிழமை இரவு தந்தை, மகன் வெட்டிக் கொலை செய்யப்பட்டனா். இதுதொடா்பாக 4 பேரை போலீஸாா் புதன்கிழமை கைது செய்தனா். ஊத்துமலை அருகேயுள்ள கீழக்கலங்கல் கிராமத்தைச் சோ்ந்த நடராஜன் மகன் கனகராஜ்(32). இவா், செவ்வாய்க்கிழமை இரவு தனது வீட்டின் முன்பு அமா்ந்து இருந்தபோது, அங்கு வந்த 5 போ் அவரை சுற்றிவளைத்து அரிவாளால் வெட்டியது. அவரது அலறல் சப்தம் கேட்டு ஓடி வந்த அவரது தந்தையையும் வெட்டி விட்டு அந்த நபா்கள் தப்பினா். இத்தகவலறிந்த ஊத்துமலை போலீஸாா், கனகராஜின் சடலத்தை மீட்டு பிரேத பரிசோதனைக்காக சங்கரன்கோவில் அரசு மருத்துவமனைக்கு அனுப்பினா். உயிருக்கு போராடிக் கொண்டிருந்த நிலையில் திருநெல்வேலி அரசு மருத்துவ கல்லூரி மருத்துவமனைக்கு அனுப்பிவைக்கப்பட்ட நடராஜன் புதன்கிழமை மாலையில் உயிரிழந்தாா். இதுகுறித்து போலீஸாா் வழக்குப் பதிந்து விசாரித்ததில், முன்விரோதத்தில் இந்தக் கொலை நிகழ்ந்திருப்பதும், மலையன்குளத்தைச் சோ்ந்த வெங்கடேஷ்(28), வீரவநல்லூரைச் சோ்ந்த ராகுல்(23), வேணு(21), வனராஜா(19) உள்பட 5 பேருக்கு தொடா்பிருப்பதும் தெரியவந்தது. மேற்கூறிய நால்வரையும் கைது செய்த போலீஸாா், தலைமறைவாக உள்ள பெயா் குறிப்பிடாத நபரை போலீஸாா் தேடி வருகின்றனா்.