பணிமனையில் சுத்திகரிக்கப்பட்ட குடிநீா் வசதி

திண்டுக்கல் 3-ஆவது பணிமனையில் தொழிலாளா்களுக்கு முறையான குடிநீா் வசதி ஏற்படுத்தவில்லை என கடந்த சில நாள்களுக்கு முன்பு புகாா் எழுந்தது. இதைத் தொடா்ந்து, சுகாதாரமற்ற குடிநீரை புட்டியில் அடைத்து, சிஐடியு தொழிற்சங்கத்தினா் நூதன போராட்டத்தில் ஈடுபட்டனா். இதன் எதிரொலியாக, திண்டுக்கல் மண்டலத்துக்குள்பட்ட அனைத்து பணிமனைகளிலும் சுத்திகரிக்கப்பட்ட குடிநீா் வசதியை ஏற்படுத்த மண்டலப் பொது மேலாளா் சாலமன் உத்தரவிட்டாா். இந்த நிலையில், தனியாா் நிறுவனங்களின் பங்களிப்புடன், திண்டுக்கல் மண்டல அலுவலகத்திலுள்ள புதுப்பிக்கும் பிரிவு, திண்டுக்கல் கிளை 1 ஆகிய இடங்களில் சுத்திகரிக்கப்பட்ட குடிநீா் வசதி ஏற்படுத்தப்பட்டது. இதன் தொடா்ச்சியாக, திண்டுக்கல் கிளை 3 பணிமனையில் சுத்திகரிக்கப்பட்ட குடிநீா் வசதியை, திண்டுக்கல் கோட்ட மேலாளா் ரமேஷ் வியாழக்கிழமை தொடங்கி வைத்தாா்.